A Confederación Empresarial de Ourense (CEO) participou de forma activa na 19ª edición de PREVISEL, o Salón da Prevención e Seguridade Laboral, celebrado en Expourense, un encontro que se consolida como unha cita de referencia en Galicia para profesionais, empresas e entidades comprometidas coa cultura preventiva e coa mellora da seguridade e saúde no traballo.
A inauguración do salón contou coa presenza do presidente da CEO, David Martínez, quen acompañou ás entidades organizadoras e ao resto de representantes institucionais no inicio desta nova edición dun evento que reúne cada ano a expertos, empresas e institucións arredor da prevención de riscos laborais.
Durante os dous días de celebración, a CEO estivo presente cun stand informativo de prevención de riscos laborais, atendido polo Gabinete Técnico de Asesoramento en Prevención de Riscos Laborais da confederación. Desde este espazo ofreceuse información, orientación e asesoramento ás empresas interesadas en reforzar as súas políticas de prevención e en promover contornas laborais máis seguras e saudables.
Entre as actividades desenvolvidas pola CEO destacou tamén o taller práctico “Os riscos de xogar á ruleta coa PRL”, unha proposta dinámica e participativa na que se abordaron diferentes situacións reais relacionadas coa seguridade no traballo. A través desta actividade, o Gabinete Técnico de PRL achegou ás persoas participantes unha forma didáctica e interactiva de reflexionar sobre os riscos laborais e a importancia da prevención nas empresas.
A clausura do salón contou coa presenza da vicepresidenta da CEO, Beatriz Gómez, quen participou no acto institucional de peche xunto coas entidades organizadoras e demais representantes institucionais, nunha xornada que puxo o broche final a dous días de encontro, intercambio de coñecemento e impulso da cultura preventiva.
A participación da CEO nesta nova edición de PREVISEL reafirma o compromiso da organización empresarial coa promoción da prevención de riscos laborais, a formación e o apoio ás empresas para avanzar cara a contornas de traballo cada vez máis seguras e responsables.
