Ourense, 6 de setembro do 2024 || A Confederación Empresarial de Ourense, en colaboración coas homólogas entidades de Lugo, Pontevedra e A Coruña, e coa promoción da Xunta de Galicia, presenta o programa “Ultreia Galicia Rexión Emprendedora, retos e solucións para un territorio intelixente”, financiado pola Unión Europea, a través do Plan de Recuperación, Transformación e Resiliencia. Dito programa, ten como obxectivo principal impulsar o emprendemento galego e fomentar a innovación, a través dunha serie de eventos que se celebrarán en catro cidades galegas, culminando nun evento final a nivel da comunidade. O primeiro evento terá lugar en Ourense, o mércores 18 de setembro, na sede da CEO e no Centro Cultural Marcos Valcárcel. 

Os detalles deste proxecto abordáronse esta semana nun encontro entre o conselleiro de Emprego, Comercio e Emigración, José González, e os presidentes das confederacións de Ourense, Marisol Novoa; A Coruña, Antonio Fontenla; Pontevedra, Jorge Cebreiros, e Lugo, Jaime Luis López. Na xuntanza tamén estiveron o secretario xeral de Emprego e Relacións Laborais, Pablo Fernández, e o presidente da Confederación de Empresarios de Galicia, Juan Manuel Vieites.  

Esta iniciativa, que conta coa implicación de 240 axentes do ecosistema emprendedor, máis de 160 startups, 40 empresas tractoras e a exposición de 16 casos de éxito, comeza na cidade de Ourense o mércores 18 de setembro, a través do desenvolvemento de dous eventos simultáneos: o Campus Startups, que se celebrará na sede da CEO, e Retos e Solucións para un territorio intelixente, no Centro Cultural Marcos Valcárcel. 

Co Campus Startups procúrase identificar e mapear as empresas de recente creación e outras iniciativas emprendedoras innovadoras e dar soporte aos proxectos para a busca de financiamento, entre outros fins, a través de conferencias, networking, presentacións de casos de éxito, mesas redondas e unha competición de iniciativas emprendedoras.

No bloque de Retos e solucións para un territorio intelixente, o obxectivo é identificar os sectores estratéxicos da provincia e os seus retos, así como ás empresas tractoras destes sectores estratéxicos e mapear os axentes do ecosistema da provincia. Para iso, levaranse a cabo mesas de traballo nas que se abordarán as cuestións clave de diferentes sectores.

Despois do evento inaugural en Ourense, terá lugar o da Coruña o 24 de setembro, seguido do de Pontevedra, que será o 25 de setembro, e o de Lugo, programado para o 26 de setembro.

O programa Ultreia Galicia contribuirá a reforzar a actividade da Rede de polos de emprendemento e apoio ao emprego e o mapa de emprendemento da Xunta -medidas que levaron a Galicia a obter por parte da Unión Europea o recoñecemento de Rexión Emprenderora Europea- así como a dinamizar as startups galegas. Forma parte da aposta do Goberno galego pola creación de novos negocios e o desenvolvemento de proxectos innovadores que fomenten o emprego de calidade e que favorezan a dinamización e vertebración do territorio.