Conecta Ourense Rural achegará a Muimenta recursos e asesoramento para impulsar as empresas do Ribeiro
A xornada celebrarase o 18 de setembro e permitirá ás empresas, persoas autónomas e emprendedoras coñecer servizos de apoio, acceder a asesoramento especializado e establecer novas conexións empresariais
A iniciativa Conecta Ourense Rural chegará o vindeiro 18 de setembro a Muimenta, no Ribeiro, cunha nova xornada destinada a achegar ao tecido empresarial da contorna recursos, programas e servizos que contribúan ao desenvolvemento dos seus proxectos, á mellora da competitividade e ao acceso a asesoramento especializado.
Baixo o título “Apoios e servizos útiles para impulsar a túa empresa”, o encontro celebrarase a partir das 11:30 horas no Centro Social de Muimenta, situado en Muimenta, nº 4.
A actividade está dirixida especialmente a empresas, persoas autónomas e emprendedoras do Ribeiro e está concibida como unha xornada práctica e participativa na que as persoas asistentes poderán coñecer ferramentas de apoio, resolver dúbidas directamente co equipo técnico, coñecer experiencias empresariais e establecer novos contactos.
Recursos para aproveitar mellor os apoios dispoñibles
Tras a recepción e benvida ás persoas participantes, ás 11:45 horas terá lugar a sesión “Conecta recursos: como aproveitar de forma coordinada os servizos de apoio ás empresas”.
Nela presentaranse de maneira práctica diferentes programas, servizos e recursos impulsados polo IGAPE, a Oficina Económica de Galicia e Conecta Ourense, co obxectivo de que as empresas poidan identificar as ferramentas que mellor se adaptan ás súas necesidades.
A sesión contará coa participación de Carla García Valcarce, técnica responsable das Oficinas Sur da Oficina Económica de Galicia (IGAPE), e María Fernández Vázquez, técnica responsable de Conecta Ourense na Confederación Empresarial de Ourense.
Asesoramento experto aplicado a retos empresariais reais
Ás 12:15 horas desenvolverase o bloque dedicado aos asesoramentos expertos, centrado en explicar de forma práctica como un acompañamento especializado pode axudar ás empresas a afrontar retos nos ámbitos financeiro e de negocio.
Participarán Rafael Martínez-Carrasco, coordinador do asesoramento experto no ámbito financeiro, e Marina Couceiro Vieitez, coordinadora do asesoramento experto no ámbito de negocio.
A sesión completarase coa experiencia de empresas que xa participaron neste tipo de acompañamento e que explicarán os retos abordados e a utilidade práctica do asesoramento recibido. Intervirán María del Carmen Bernárdez, de Mosquiños Fisioterapia, e Iago Ríos Rodicio, de Xesta Formacións.
Networking para favorecer novas conexións
A partir das 13:00 horas, as persoas asistentes participarán nun espazo de networking e ágape de traballo, pensado para compartir experiencias, establecer contactos e favorecer novas relacións entre empresas, entidades e persoal técnico.
A xornada concluirá ás 14:30 horas cunha visita guiada á Aldea Modelo “Muimenta Viva”, na que se poderán coñecer os diferentes espazos da iniciativa, o seu funcionamento e as oportunidades que ofrece a contorna.
Atención individualizada ás empresas
As empresas ou persoas emprendedoras que precisen unha atención máis específica poderán solicitar, a través do propio formulario de inscrición, unha reunión individualizada co equipo técnico de Conecta Ourense.
Este encontro permitirá trasladar necesidades concretas, analizar posibles proxectos e identificar programas, recursos, apoios ou servizos que poidan resultar de interese para cada iniciativa empresarial.
Datos da xornada
Data: venres, 18 de setembro de 2026
Hora: 11:30 h
Lugar: Centro Social de Muimenta. Muimenta, nº 4
Participación: gratuíta
Inscrición: https://forms.gle/JA82FHkCaySxH55N7
Para máis información, as persoas interesadas poden contactar coa Confederación Empresarial de Ourense no 988 391 110 ou a través do correo electrónico conectaourense@ceo.es.
Conecta Ourense Rural Muimenta (O Ribeiro) está impulsada pola Confederación Empresarial de Ourense e a Xunta de Galicia, a través do Instituto Galego de Promoción Económica (IGAPE), coa colaboración da Asociación de Jóvenes Empresarios de Ourense (AJE Ourense).
- Centro Social de Muimenta. Muimenta, nº 4
- Venres, 18 de setembro de 2026
- 11:30
Contacta con la CEO
Estamos a tu disposición de lunes a viernes
Enlaces de interés
TE ATENDEMOS EN
- SEDE CENTRAL
- O BARCO
