- Consiste nun programa acelerado para obter resultados aplicables a calquera actividade na redución da pegada de carbono e conseguir parámetros máis sustentables
- As empresas interesadas en participar proceden de distintas comarcas ourensás e sectores tan diversos como o vitivinícola, industrial, construción, automoción, ou recursos naturais entre outros
- O 19 de maio na sesión final daranse a coñecer as accións e resultados das empresas participantes para chegar aos obxectivos fixados
- Nas edicións anteriores, as empresas participantes acadaron plans concretos para reducir a súa pegada de carbono nun prazo establecido
- A obtención dos selos acreditativos e cumprir cos parámetros de sostibilidade a nivel europeo son algúns dos obxectivos desta actividade de Conecta Ourense
- A Xunta, a través de Igape, facilita que a Oficina Conecta Ourense da CEO poida por en marcha novamente esta iniciativa sostible
Ourense, 24 de marzo, 2026_ Hoxe tivo lugar a primeira sesión online informativa desta iniciativa que comezou hai dous anos para fomentar a transformación do tecido produtivo da provincia cara a modelos máis sostibles e innovadores.
O programa Pegada de Carbono da Oficina Conecta Ourense naceu co obxectivo de acompañar ás empresas na medición, xestión e redución da súa pegada de carbono, nun contexto marcado polo avance da normativa climática a nivel europeo, estatal e autonómico e pola crecente esixencia de transparencia en materia de sostibilidade. A iniciativa céntrase especialmente no cálculo das emisións de gases de efecto invernadoiro asociadas aos alcances 1 e 2 —emisións directas e indirectas polo consumo enerxético— e na definición de estratexias eficaces de descarbonización aliñadas cos requisitos regulatorios actuais e futuros.
Norberto Penedo, director da Área de Competitividade do Igape, presentou a sesión resaltando a importancia das dúas edicións previas deste programa e os bos resultados obtidos polas empresas que participaron anteriormente. Penedo falou tamén das iniciativas Conecta Ourense e Conecta Lugo, como estratéxicas e puxo en valor as propostas innovadoras que a CEO leva a cabo a través da súa Oficina Conecta Ourense.
Ao longo do programa as empresas participantes adquirirán as capacidades necesarias para calcular a súa pegada de carbono conforme a metodoloxías recoñecidas, identificar as súas principais fontes de emisión e establecer un ano base de referencia. Así mesmo, traballarán na elaboración de plans de redución a medio prazo, incorporando medidas concretas e obxectivos cuantificables, así como no deseño de estratexias de compensación e na preparación de informes de emisións. O itinerario inclúe tamén a avaliación de resultados, a posta en común de experiencias e o acompañamento en procesos como o rexistro oficial da pegada de carbono e a verificación de emisións, aspectos cada vez máis relevantes no marco normativo vixente.
A metodoloxía será de sesións formativas en liña, complementadas con reunións individuais de seguimento e unha sesión final presencial na que se presentarán os resultados e se compartirán experiencias empresariais. Este enfoque práctico busca non só facilitar o cumprimento normativo, senón tamén impulsar a competitividade empresarial, identificar oportunidades de aforro de custos e fomentar a integración do factor carbono na estratexia corporativa. As distintas sesións serán os días 14 e 21 de abril, e no mes de maio o 5 e o 19, data na que remata o programa coa posta en común dos resultados obtidos polas empresas.
Na sesión inicial de hoxe participou a experta en pegada de carbono Marta Sánchez, directora de PFS Grupo, consultora que guiará ás empresas participantes cara a esta medición da pegada de carbono. O contexto actual do cambio climático e a importancia da descarbonización, así como ao marco regulatorio que afecta ás organizacións foi o punto de partida das explicacións da relatora, quen abordou tamén os conceptos fundamentais da pegada de carbono, as súas distintas tipoloxías —organizacional, de produto e de evento— e os principios básicos para o seu cálculo, incluíndo a identificación de fontes de emisión, a delimitación de alcances e o uso de factores de emisión. Ademais, presentáronse as principais metodoloxías internacionais de referencia e analizáronse os riscos e oportunidades que o cambio climático supón para as empresas, desde o punto de vista regulatorio, reputacional e de mercado, destacando a pegada de carbono como unha ferramenta clave para a toma de decisións e a mellora da eficiencia operativa.
