A sede da Confederación Empresarial de Ourense acollerá o vindeiro mércores, 25 de febreiro de 2026, a celebración do Día Europeo para a Igualdade Salarial, unha xornada organizada polo Campus de Igualdade da Xunta de Galicia no marco do programa de igualdade laboral.
O encontro terá lugar nas instalacións da CEO (Praza das Damas, 1, Ourense) en horario de 16.30 a 18.30 horas, con recepción e café de benvida ás 16.00 horas, e poderá seguirse tanto en modalidade presencial como por streaming.
O obxectivo xeral do taller é afondar na integración do principio de igual retribución por traballos iguais e de igual valor, ofrecendo ferramentas prácticas para a súa aplicación nas organizacións.
Entre os obxectivos específicos destacan:
– O estudo do principio de igualdade retributiva e das ferramentas para aplicar o concepto de traballo de igual valor.
– A análise dos complementos salariais e extrasalariais, incentivos e beneficios sociais desde unha perspectiva de xénero.
– A aplicación de criterios claros, obxectivos e neutros como garantía da igualdade retributiva.
– A valoración dos postos de traballo como base para a definición dunha política retributiva axustada ao marco normativo.
– As medidas de acción positiva para reducir ou eliminar a fenda salarial de xénero.
– O uso de ferramentas como o rexistro retributivo e a auditoría retributiva.
– As obrigas derivadas da futura transposición da Directiva (UE) 2023/970 sobre transparencia retributiva e vías de reparación e cumprimento efectivo.
A sesión será presentada por Pablo Fernández López, Secretario Xeral de Emprego e Relacións Laborais da Xunta de Galicia.
Beatriz Sueiro Padín, Inspectora de Traballo e Seguridade Social, abordará a igualdade e transparencia retributiva desde a perspectiva da Inspección de Traballo.
Pola súa parte, José Fernando Lousada Arochena, maxistrado do Tribunal Superior de Xustiza de Galicia, analizará a Directiva (UE) 2023/970 e as vías de reparación e cumprimento efectivo que reforzan o principio de igualdade de retribución.
O programa inclúe tamén dúas roldas de consultas para resolver dúbidas das persoas asistentes.
As persoas que desexen obter o certificado de aproveitamento deberán, ademais de asistir á xornada (presencialmente ou por streaming), superar satisfactoriamente polo menos o 70 % das cuestións do test de avaliación que estará dispoñible no campus en liña.
Para asistencia presencial a través da seguinte ligazón:
Para seguimento por streaming, accedendo coas túas credenciais ao Campus en liña de Igualdade Laboral e inscribíndote no taller correspondente.
O prazo de inscrición permanecerá aberto ata o martes 24 de febreiro ás 23.59 horas.
