A Confederación Empresarial de Ourense (CEO) celebrará o vindeiro 9 de abril de 2026, a partir das 10:00 horas, o primeiro Observatorio sobre Capital Humano: Absentismo Laboral e Escaseza de man de obra, unha xornada que terá lugar na sede da organización, en Ourense.
Este encontro nace co obxectivo de analizar en profundidade dous dos principais retos aos que se enfrontan actualmente as empresas: o incremento do absentismo laboral e a dificultade para cubrir determinados perfís profesionais. Ao longo da sesión abordaranse estas cuestións desde un enfoque práctico, con casos reais e propostas aplicables ao día a día empresarial.
Data: 9 de abril de 2026
Horario: de 10:00 a 14:00 horas
Lugar: Sede da CEO · Praza das Damas, 1 – 32005 Ourense
Obxectivos da xornada
1. Analizar a situación actual
Afondarase nas causas do aumento do absentismo laboral e nas dificultades para atopar determinados perfís, así como no impacto que estas circunstancias teñen na actividade diaria das empresas.
2. Achegar criterios prácticos para a xestión empresarial
Ofreceranse orientacións sobre como actuar ante baixas prolongadas, como afrontar a falta de cobertura de vacantes e que ferramentas poden axudar a mellorar a organización interna.
3. Presentar solucións eficaces
Durante a sesión compartiranse medidas que están a demostrar ser efectivas para reducir o absentismo, así como estratexias orientadas á atracción e retención do talento, poñendo o foco na mellora do clima laboral e na motivación dos equipos.
4. Resolver dúbidas habituais
Abordaranse cuestións clave como as obrigas e límites legais en situacións de baixa laboral, a xestión da reincorporación das persoas traballadoras ou as alternativas dispoñibles cando non se atopa persoal.
Esta iniciativa está organizada pola Confederación Empresarial de Ourense no marco do Convenio de colaboración entre a Consellería de Emprego, Comercio e Emigración e as organizacións sindicais e empresariais participantes no diálogo social en Galicia, orientado ao impulso, desenvolvemento e seguimento dos acordos acadados neste ámbito.
